魔法音符
[第一幕]
(隣居正在憩睡中、忽然傳來巨大的音樂聲)
隣居甲： (怒) 呀…好嘈呀！
隣居丙﹕ 救命呀，我聽日仲要返工𠺢！
隣居乙﹕ 我仲慘，我仲要考試𠻹！
隣居丁﹕ 太過份嘞…唔得！我哋要投訴！
(隣居衝去DoReMi家投訴，拍門)
DoReMi: (驚) 呀…各位，乜噤夜呀？
隣居甲： 乜你都知夜咩？仲鬼殺咁嘈！(眾怒視DoReMi)
(忽然卡達女巫怒氣沖沖的衝入，拿着一個破水晶球)
眾隣居： 嘩！卡達女巫呀！(避開)
卡達女巫: DoReMi！你嘈到我個揾食工具水晶球都整爆咗，哼！你咪指意有好日子過！
DoReMi： (驚) 對…唔住呀，我…無心𠺢，不…如我賠返個新嘅比你丫？
卡達女巫： (揪着DoReMi) 賠？太遲啦。我宜家要詛咒你！(喃喃自語) 哼！問你怕未！(離開)
DoReMi： (追着卡達女巫) 吓？唔好呀…
隣居乙： (指住DoReMi) 你死嘞，得罪女巫仲慘過得番一毫！
隣居丙： 比佢詛咒過仲可憐過跌落河！
隣居丁： 哼！問你怕未！(跟着卡達女巫離開)
DoReMi： 今次弊啦，點算好呢？(忐忑不安) 呀，不如我彈返首歌比卡達女巫聽…唔得，佢最憎就係我d音樂，唉…(悶悶不樂，忽然醒起) 宜家我咁嘅心情，最適合奏呢首樂曲。(演奏樂曲) 咦？點解d聲噤怪嘅？(忽然有些黑色東西由小提琴上跌下來) 吓？點會咁𠺢？成地都係…(拿起一個音符) 音符？(再奏其他樂器) 嘩，弊啦，越嚟越多音符𠻹，點算呢？(拍門聲) 咦？係邊位？(開門)
包租婆： (怒) DoReMi，你呢個正衰人！唔係半夜三更鬼殺咁嘈，就唔知攪d乜嘢整到周圍都係垃圾，你睇吓 (拿起垃圾桶) 真係激死我!
DoReMi： 包租婆，我都唔知點解會攪成咁，你唔好嬲啦，至多我拉隻歌你聽丫。(預備演奏)
包租婆： STOP！算我怕咗你，唔該你即刻搬！
DoReMi： 包租婆…
包租婆： 走啦！
[第二幕]
(DoReMi 流浪到森林裏，繼續演奏，音符入，唱「小小音符歌」。動物紛紛出來吃地上的音符)
音符： (唱) 小小音符，真真得意，味道多多，好滋味！
動物： (唱) Yummy, yummy, yummy, yummy, DoReMi d 音符好好味！
DoReMi： 咦？乜d音符食得嘅咩？(試食) 嘩，果然係好味喎！呀，不如我將d音符整成罐頭，然後拎去買，唔知d人會唔會鍾意呢？好，一於去試吓先！
[第三幕]
(街上有多人在排隊買音符罐頭)
街坊三： 死啦，唔知今日買唔買到呢？
街坊四： 咪係囉，噚日我買唔到舒伯特嘅 ‘鱒魚’味，淨係買到德布西嘅 ‘海’味咋！
街坊三： 唉，你買到咪好囉，我遲咗半個鐘之嘛，就連個罐都無lu！所以今日幾大都早d到，唔好𢴇輸！
(街坊二忽插隊)
街坊一： 喂，你做乜嘢打尖呀！(與街坊二互相推撞)
街坊二： 乜嘢打尖呀？你小心d講嘢喎，我今朝一早就喺度𠺢，哼！計我話，分明係你打尖，仲惡人先告狀，嗱，你…咪再推喎！(繼續推撞，警察入)
警察： 喂！你哋快d停手！(制止打架) 你哋做乜嘢打交？
街坊一： madam，我明明係排先，呢個衰人打尖！
街坊二： 唔係呀呀madam，我一早就喺度排𠺢，呢個人打尖就真！
警察： 唔好嘈！你哋洗乜噤緊張？買唔到咪算囉，大家一場街坊，要和和氣氣先至啱。
街坊一： (緊張) madam，唔緊張就買唔到DoReMi牌音符罐頭𠺢嘞！(街坊和應)
警察： DoReMi牌音符罐頭？乜嘢呢𠺢？
街坊四： 吓，madam，你竟然唔知乜嘢係DoReMi牌音符罐頭？好好味𠺢！
警察： (懷疑) 有冇噤好味呀？(剛巧有人買了音符罐頭，警察截停他)
你咪行住！
街坊三： madam，有…乜嘢事？
警察： 我而家懷疑你藏有違禁品 (強搶罐頭，試食) 嘩，我食到催眠曲嘅甜味呀！好味呀！(立刻打尖買罐頭) 唔該比一罐我丫！
眾街坊： 嘩，差人都打尖呀！(混亂作一團，退下)
[第四幕]
(電視正播出DoReMi的訪問節目)
主持： 相信各位觀眾都好清楚DoReMi牌音符罐頭嘅魔力，我哋今日好榮幸請到DoReMi牌音符罐頭創辦人DoReMi先生接受我嘅訪問，有請DoReMi先生。(拍掌聲，DoReMi入) 歡迎你DoReMi先生。
DoReMi： 大家好。
主持： DoReMi先生，大家都知道你整果d音符罐頭唔單止好好味，仲可以食到唔同古典樂曲嘅味道𠻹。請問你介唔介意透露吓有d乜嘢秘方可以做到噤美味嘅食物呢？
DoReMi： 秘方我就無，不過我每次演奏樂曲，就會有d音符跌出嚟𠺢嘞。
主持： 嘩，真係聞所未聞，DoReMi先生請問你可唔可以即場示範一下呢？
DoReMi： 好呀。(DoReMi演奏樂曲，音符越來越多，忽然間，電視機爆炸，並流出臭水)
觀眾： 吓？點解個電視會爆炸？無電視睇點算呀？(掩著鼻) 嘩，好臭呀，快d走！
(一片混亂)
[第五幕]
(一家人在家中十分無聊)
姐姐： (試開電視) 唉，唔記得咗部電視壞咗添！好悶呀！(見到妹妹在做功課)
呀妹，你仲未做完功課咩？
妹妹： (冷淡地) 唔…
姐姐： 咁，你有無唔識嘅想問我呀？
妹妹： (驚訝) 吓，乜你依家好得閒咩？咁好心嘅？
姐姐： 乜家姐教細妹做功課都叫好心咩？
妹妹： 梗係啦，你正一「電視大過天」，我以前問你功課，你都唔睬我
姐姐： (仿然大晤)呀，係咩，乜我以前係咁𠺢？點呀，有乜嘢唔識呀？(姐妹細聲談話)
(爸爸回到家中)
爸爸： 我返嚟嘞！(試開電視) 唉，唔記得咗部電視壞咗添！(無聊狀) 媽咪，洗唔洗我幫你呀？
媽嗎： (打掃中) 唔洗嘞，不如你去睇吓嫲嫲啦，佢話隻腳好似唔舒服喎！
爸爸： 吓，呀媽，你見邊度唔舒服呀？
嫲嫲： 咪又係隻衰腳囉，老骨頭真係無用囉。
爸爸： 呀媽，你邊算老呀，你唔記得咩，你閙人果把聲，十條街外都聽到呀！
嫲嫲: (笑)咪係閙你個衰仔囉！(忽然面露痛楚，手按着膝頭) 哎呀！
爸爸： 又痛呀！等我幫你搽d藥油啦。(幫嫲嫲搽油) (一家人靜止動作)
(大賊11和同黨入)
儍強： 大佬，你諗清楚d好呀，我哋重要跟住你揾食𠺢。(攔住大賊11)
大賊： 儍強，你唔好攔住我！仲記唔記得人哋以前係點叫我？(強、仁齊道：大賊11哥，威震江湖呵呵呵！)
哼！想當年我每做一單案，電視新聞就差唔多日日都講有關我嘅新聞，而家無咗電視，d人再唔知道我犯案有幾噤完美，我做賊仲有乜意思丫？(走狀)
呀仁： 11哥，咁你去啦。
儍強： 呀仁，你short咗呀！
呀仁： 我好清醒，我都好厭倦呢種咁嘅生活！11哥，我哋去自首啦！(一齊退下)
儍強： 喂，你哋唔好走得噤快，等埋我。(強退下)
[第六幕]
DoReMi： 今次慘嘞，因為我，累到其他人無得睇電視，佢哋一定會憎死我… (隣居乙、丙入，DoReMi驚)
隣居乙： Hi，DoReMi！多謝你呀，全靠你，我先至可以專心讀書咋，今次考試我仲考得好好添！
隣居丙： 我都係呀，嘻，平時我成日追電視劇，追到覺都唔瞓，攪到第二朝返工唔夠精神。而家我返工再無hup眼瞓，老細仲加我人工𠻹。(乙、丙，DoReMi退下，妹妹和姐姐入)
姐姐： 真係唔講都唔知道，原來我睇噤多電視！
妹妹： 咪係囉，成日唔睬人！
姐姐： 我以後唔會嘞，其實d電視劇做嚟做去咪又係果d，睇睇吓都有d悶…
妹妹： 家姐，不如去公園打羽毛球囉？
姐姐： 好呀，日日運動，對身體都會好d…
妹妹： 對你對眼就最好…
姐姐： 你！(姐追着妹退下)
(爸爸扶着嫲嫲入)
嫲嫲： 唏！你咪當我跛咗先得，我仲行得，你睇你睇 (掙扎不讓爸扶)，我都無事！
爸爸： 你…咪亂嚟呀，呀媽，醫生話你唔可以再跌…
嫲嫲： (怒) 你作死呀，衰仔，咒呀媽！(走了數步)
呀仔，你唔洗成日陪住我喎，你自己去玩啦！
爸爸： 得架啦，呀媽，都係陪你好d…
嫲嫲： (笑) 得啦，唏，仲長氣過我呢個百爺婆！(嫲、爸退下)
(大賊11，呀仁，儍強在台的右方入)
儍強： 我諗我真係儍咗，跟埋11哥入嚟坐監，唉…(搖頭嘆息)
大賊： 跟住大佬好失禮你咩？你知唔知而家出面d人點話我呀？
儍強： 叫乜嘢呀？
大賊： 改邪歸正嘅11哥，靚仔過以前好多！哈！
呀仁： 呢句好好多！好過以前果句…好老套 (仁低頭睇書)
儍強： 呀仁，你又做乜嘢呀，睇書？你又short咗呀？
呀仁： 我好清醒。喺呢度第二d無野做，咁我咪睇書囉。正所謂「書中自有黃金屋」，呢d黃金值錢過我哋以前果d𠺢。
儍強： 有噤好，喂，拎嚟睇睇啦！(仁、強和大賊一齊睇書，哨子聲響，三人退下)
(Madam入)
Madam： 嘩，無死囉，依家無哂D大賊，咁我再唔洗加班，可以快D返屋企陪仔女，嘻！(走了兩步) 呀，唔記得攞返罐音符罐頭返去加餸𠻹！(攞罐頭，退下)
(DoReMi入，在台左邊)
DoReMi： 估唔到我D音樂同音符會噤受歡迎，咁我以後可以放心演奏lu…(頓一頓)呀，不過唔好噤大聲，依家週圍都噤安靜，如果我嘈到人就唔好啦！(演奏，燈光暗)
(卡達女巫入，在台右邊)
卡達女巫： 激死我嘞！我詛咒果個DoReMi，諗住等佢以後無日好過，點知依家佢大受歡迎𠻹！激死我！佢又拉小提琴…呀！我個水晶球又爛咗！(怒極，燈光暗)
(燈亮，音符、群眾入，唱「小小音符歌」)
音符： (唱) 小小音符，真真得意，味道多多，好滋味！
群眾： (唱) 大人小孩, 相親相愛, 美好家庭好福氣！
[全劇完]